@HR တွေ ကောင်းစွာပြင်ဆင်ထားရမည့်အချိန်@

အမေရိကန်အခြေစိုက် Hilton Nay Pyi Taw ဟိုတယ်ဖွင့်ပွဲတွင် ဟိုတယ်ပိုင်ရှင်ထံမှ သတင်းစကားတစ်ခုကြားရသည်။ ၀န်ထမ်းရေးရာနှင့် ပတ်သက်၍ ဖြစ်သည်။

ဟိုတယ်ဝန်ထမ်းများနေထိုင်သည့် အခန်းအားလုံးကို လေအေးပေးစက်တပ်ပေးရန်၊ ၀န်ထမ်းစားရိပ်သာတွင် လေအေးပေးစက်တပ်ဆင်ပေးရန်နှင့် ၀န်ထမ်းများ
အားကစားပြုလုပ်ရန်အတွက် နေရာစီစဉ်ပေးရန် Hilton ဟိုတယ်စီမံခန့်ခွဲရေးအဖွဲ့မှ တောင်းဆိုခဲ့ကြောင်း ဧဒင်ကုမ္ပဏီအကြီးအကဲ ဦးချစ်ခိုင်က ပြောသည်။

ဌာနအကြီးအကဲများအား တစ်ဦးလျှင် အခန်းတစ်ခန်းပေးရပြီး အောက်ခြေ၀န်ထမ်းများ တစ်ခန်းလျှင် နှစ်ယောက်သာ ထားရှိသည်။ အခန်းအားလုံးတွင် ရုပ်မြင်သံကြားစက်တပ်ဆင်ပေးပြီး နိုင်ငံတကာရုပ်သံလိုင်းများပါ ကြည့်ရှုနိုင်သည်။

နိုင်ငံတကာစီမံခန့်ခွဲမှုပုံစံဖြင့် လုပ်ကိုင်သည့် ပြည်ပရင်းနှီးမြှုပ်နှံမှုလုပ်ငန်းများ ယခုကဲ့သို့ ၀င်ရောက်လာချိန်တွင် ပြည်တွင်းရှိ လုပ်ငန်းများထက် ခံစားခွင့်၊ လစာ၊ အတတ်ပညာတိုးမြင့်ရရှိရန် ပြောင်းရွှေ့လုပ်ကိုင်မှုများလည်းရှိလာသည်။

အထူးသဖြင့် ပြည်တွင်းလုပ်ငန်းများမှ ကျွမ်းကျင်ပြီး ထူးချွန်သည့် လုပ်သားများကို ဆုံးရှုံးရမည့်အခြေအနေမျိုးကို မြန်မာလုပ်ငန်းရှင်များ ကြိုတင်တွက်ဆပြင်ဆင်ထားရန် လိုသည်။ ထို့ကြောင့် ကုမ္ပဏီလုပ်ငန်းတိုင်းတွင် လူသားအရင်းအမြစ်ဌာနဟုခေါ်သည့် HR ဌာနများ အလုပ်ကောင်းကောင်းလုပ်ရန်လည်း ပြင်ဆင်ထားရမည် ဖြစ်သည်။

အောက်တိုဘာ ၁၇ ရက်က နေပြည်တော်တွင် ဖွင့်လှစ်ခဲ့သော Hilton Nay Pyi Taw ဟိုတယ်ကို ဧဒင်ကုမ္ပဏီကပိုင်ဆိုင်ပြီး အမေရိကန်အခြေစိုက် Hilton World Wide ကုမ္ပဏီက စီမံခန့်ခွဲမှုပိုင်း တာဝန်ယူထားခြင်းဖြစ်သည်။

ပြည်တွင်းစီမခန့်ခွဲမှုဖြင့် ဖွင့်လှစ်ထားသော ဟိုတယ်အများစုတွင် ၀န်ထမ်းရေးရာနှင့်ပတ်သက်၍ ထိုကဲ့သို့သော ၀န်ဆောင်မှုများကို တွေ့ရမည်မဟုတ်ပေ။ ဟိုတယ်အများစုတွင် ဌာနအကြီးအကဲများ နေထိုင်သောအခန်းများကို လေအေးပေးစက်တပ်ဆင်ပေးသော်လည်း ၀န်ထမ်းများအတွက်မူ လေအေးပေးစက်တပ်ဆင်ခြင်းမရှိပေ။ ထို့အပြင် တစ်ခန်းလျှင် ၀န်ထမ်းငါးယောက်၊ ခြောက်ယောက် ထားလေ့ရှိကြသည်။ အချို့သော ဟိုတယ်များတွင် လေအေးပေးစက် တပ်ဆင်ထားသော်လည်း တစ်ခန်းလျှင် လေး၊ ငါးယောက်ခန့် နေကြရသည်။

‘‘အစားအသောက်လည်း ကောင်းကောင်းကျွေးတယ်။ Local(ပြည်တွင်း)ကလူတွေ အုပ်ချုပ်တဲ့ဟိုတယ်မှာ စားစရိတ်အတွက် တစ်နေ့ကို တစ်ယောက် ၁၅၀၀(ကျပ်)လောက်ပဲသုံးတယ်။ အခု Hilton မှာ ငါးထောင်လောက် သုံးထားတယ်’’ဟု Hilton Nay Pyi Taw ဟိုတယ်အရောင်းမန်နေဂျာ ကိုအေးမင်းထွန်းကပြောသည်။

ထို့ကြောင့်လည်း ပြည်တွင်းစီမံခန့်ခွဲမှုလုပ်ကိုင်နေကြသော ဟိုတယ်ဝန်ထမ်းများမှာ နိုင်ငံတကာစီမံခန့်ခွဲအုပ်ချုပ်မှုဖြင့် အုပ်ချုပ်သော ဟိုတယ်များသို့ ပြောင်းရွှေ့မှုများလာကြသည်။ အထူးသဖြင့် လုပ်ငန်းတွင်ထူးချွန်သူများ၊တော်သူများမှာ နိုင်ငံခြားရင်းနှီးမြှုပ်နှံမှု ဟိုတယ်များသို့ ပြောင်းသွားကြပြီ ဖြစ်သည်။

‘‘နိုင်ငံတကာအတွေ့အကြုံ လိုချင်တာလည်းပါတယ်။ လစာကလည်း ကောင်းတယ်။ ၀န်ထမ်းကိုလည်း ကောင်းကောင်းထားတော့ ပြောင်းတဲ့လူ အရမ်းများတယ်’’ဟု ဟိုတယ်တစ်ခုမှ Lake Garden ဟိုတယ်သို့ ပြောင်းရွှေ့ခဲ့သူကို ခိုင်ဇော်ဝင်းကပြောသည်။

ဟိုတယ်လုပ်ငန်းတွင်သာမက အခြားသောပြိုင်ဆိုင်မှုပြင်းထန်သည့် အချိုရည်လုပ်ငန်းနှင့် အထည်ချုပ်လုပ်ငန်းတို့တွင်လည်း နိုင်ငံတကာကုမ္ပဏီများသို့ ပြောင်းရွှေ့မှုများလာကြောင်း သိရသည်။

‘‘၀န်ထမ်းရဲ့ လိုအပ်ချက်တွေ နားလည်ရမယ်။ လိုအပ်ချက်ဆိုတာ ငွေတစ်ခုတည်းမဟုတ်ဘူး။ သူတို့တွေရဲ့ လိုအပ်ချက်ကိုပါ ပြောပြဖို့လိုတယ်’’ဟု ချက်ထရီယမ်ဟိုတယ် မန်နေဂျာ ဒေါ်မေမြတ်မွန်ဝင်းကပြောသည်။

သမ္မတဦးသိန်းစိန် ဦးဆောင်သော အစိုးရတက်လာပြီးနောက် ပြည်ပစီးပွားရေးလုပ်ငန်းရှင်များအား မြန်မာနိုင်ငံသို့ လာရောက်ရင်းနှီးမြှုပ်နှံရန် ဖိတ်ခေါ်ခဲ့သည်။ ထို့ကြောင့်လည်း နေပြည်တော်မှာပင် စင်ကာပူအခြေစိုက် Park Royal ဟိုတယ်နှင့် Hilton တို့မှာ မကြာသေးမီက စတင်ဖွင့်လှစ်ခဲ့ကြသည်။

ထို့အပြင် အင်းလေးဒေသတွင် Novotel ဟိုတယ်မှာ မကြာမီက ဖွင့်လှစ်ခဲ့ပြီး ငပလီကမ်းခြေတွင်လည်း နိုဝင်ဘာ၌ Hilton ဟိုတယ် ဖွင့်လှစ်ရန် ပြင်ဆင်နေပြီဖြစ်သည်။

အချိုရည်လုပ်ငန်းတွင်လည်း ကိုကာကိုလာ၊ Pepsi နှင့် Sunkist အချိုရည်လုပ်ငန်းတို့ ၀င်ရောက်လာခဲ့သည်။ အထည်ချုပ်လုပ်ငန်းတွင်လည်း အမေရိကန်အခြေစိုက် GAP ကုမ္ပဏီတို့ ၀င်ရောက်လာခဲ့သည်။

အဆိုပါ နိုင်ငံတကာလုပ်ငန်းများအနေဖြင့် ၀န်ထမ်းရေးရာနှင့်ပတ်သက်၍ သင်တန်းများ ဆောင်ရွက်ပေးခြင်း၊ ဥပဒေတိကျစွာ လိုက်နာခြင်းနှင့် အခြားသော ၀န်ဆောင်မှုများတွင် ပြည်တွင်းလုပ်ငန်းရှင်များထက် သာလွန်ကြသည်။

‘‘HR Development(လူ့စွမ်းအားအရင်းအမြစ်ဖွံ့ဖြိုးမှု)ကို ဦးစားပေးတယ်။ ၀င်ဝင်ချင်း အလုပ်ခိုင်းမယ်ဆိုတာမျိုး မဟုတ်ဘူး’’ဟု Hilton Nay Pyi Taw ဟိုတယ်မှ ကိုအေးမင်းထွန်းကပြောသည်။

Hilton Nay Pyi Taw ဟိုတယ်တွင် လူ့စွမ်းအားအရင်းအမြစ်ဖွံ့ဖြိုးရေးအတွက် ၀န်ထမ်းများအား သင်ကြားရန် အင်တာနက်လိုင်းရရှိသော ကွန်ပျူတာများတပ်ဆင်ထားသည့် သင်တန်းခန်းများနှင့် အင်္ဂလိပ်စာပုံမှန်သင်ကြားမည့် သင်တန်းခန်းတို့ပါရှိသည်။

ထို့နည်းတူ ကိုကာကိုလာကုမ္ပဏီတွင်လည်း ပြည်တွင်းလုပ်ငန်းရှင်များနှင် ကွာခြားသည့်အချက်တစ်ချက်မှာ စွမ်းဆောင်ရည်မြှင့်သင်တန်းများကို ဦးစားပေးဆောင်ရွက်ခြင်းဖြစ်ကြောင်း အဆိုပါကုမ္ပဏီမှ အကြီးတန်းဝန်ထမ်းတစ်ဦးကဆိုသည်။

‘‘အလုပ်ခွင်သင်တန်းတွေ အဓိကလိုတယ်’’ဟု ကိုကာကိုလာအချိုရည်ကုမ္ပဏီမှ ၀န်ထမ်းတစ်ဦးကပြောသည်။

ထို့အပြင် ကိုကာကိုလာကုမ္ပဏီတွင် အလုပ်သမားများရပိုင်ခွင့် အလုပ်ချိန်နှင့်ပတ်သက်၍ တိကျစွာလိုက်နာဆောင်ရွက်ပြီး အလုပ်ချိန်ရှစ်နာရီသတ်မှတ်ကာ အချိန်ပိုဆောင်ရွက်ပါက နှစ်ဆပေးသည်။

ထို့အပြင် အလုပ်ခေါ်သည့်အခါတွင်လည်း ကျား၊ မနှင့် အသက်အပိုင်းအခြား ခွဲခြားကန့်သတ်မှုမရှိသည်ကို တွေ့ရသည်။ ထို့အပြင် အလုပ်ခန့်ထားသည့်အခါတွင်လည်း လုပ်ဆောင်ရမည့်တာဝန်ကို တိတိကျကျ သတ်မှတ်ပေးသည်။

ကိုကာကိုလာကုမ္ပဏီတွင် လုပ်ကိုင်နေသော ၀န်ထမ်းများအနေဖြင့် မကျေနပ်ပါက အမေရိကန်ရုံးအထိ တိုင်ကြားနိုင်သည်။ ထိုသို့ တိုင်ကြားရာတွင် အင်္ဂလိပ်သာသာဖြင့် မရေးတတ်ပါက မြန်မာဘာသာဖြင့် ရေးသားနိုင်ပြီး တိုင်ကြားသူ၏ နာမည်ကို မဖော်ပြဘဲ တိုင်ကြားခွင့်ပြုထားခြင်းဖြစ်သည်။

‘‘Hilton ဟိုတယ်မှာဆိုရင် ၀န်ထမ်းကို Staffတို့ Employee တို့မခေါ်ရဘူး။ Team Member(လုပ်ဖော်ကိုင်ဖက်)လို့ ခေါ်ရတယ်’’ဟု အဆိုပါဟိုတယ်ဝန်ထမ်းတစ်ဦးကဆိုသည်။

ထိုကဲ့သို့ နိုင်ငံခြားရင်းနှီးမြှုပ်နှံမှုများက ၀န်ထမ်းများနှင့်ပတ်သက်၍ ၀န်ဆောင်မှုကောင်းမွန်စွာ ပေးသော်လည်း မပေးသည့်ကုမ္ပဏီများလည်း ရှိသည်။

‘‘Novotel ကလုပ်နေတဲ့ Lake Garden ဟိုတယ်မှာဆိုရင် ၀န်ထမ်းတွေကို တစ်ခန်းကို ၄-၅ ယောက်ထားတယ်။ ပစ္စည်းပစ္စယမစုံဘဲနဲ့ ရအောင်လုပ်ခိုင်းတာတွေရှိတယ်’’ဟု အဆိုပါဟိုတယ်တွင် တာဝန်ထမ်းဆောင်ခဲ့သူ ၀န်ထမ်းတစ်ဦးကပြောသည်။

အဆိုပါဟိုတယ်အနေဖြင့် ၀န်ထမ်းအဆောင်များ မပြီးစီးမီ ဖွင့်လှစ်ခဲ့သဖြင့် ကုမ္ပဏီပိုင်သည့် လုံးချင်းတိုက်ခန်းများတွင် ထားရခြင်းဖြစ်နိုင်ကြောင်း အဆိုပါဝန်ထမ်းကဆိုသည်။ ထိုကဲ့သို့ ပြည်ပရင်းနှီးမြှုပ်နှံမှုများက ၀န်ထမ်းရေးရာနှင့်ပတ်သက်၍ ကောင်းမွန်စွာထားရှိလာခြင်းကြောင့် ၀န်ဆောင်မှုနှင့်ပတ်သက်၍ ကောင်းမွန်ကြခြင်းဖြစ်သည်။

ပြည်တွင်းလုပ်ငန်းရှင်အချို့မှာ ယခုအချိန်ထိ ၀န်ထမ်းရေးရာနှင့်ပတ်သက်၍ ပြည်ပရင်းနှီးမြှုပ်နှံမှုလုပ်ငန်းရှင်များကဲ့သို့ လုပ်ဆောင်မပေးကြသေးပေ။ အချို့မှာ ၀န်ထမ်းရေးရာနှင့်ပတ်သက်၍ ပြောင်းလဲမှုအချို့ ပြုလုပ်လာသော်လည်း အများစုမှာ ယခင်ကအတိုင်းသာ ရှိနေကြသေးသည်။

ဟိုတယ်လုပ်ငန်းနှင့်ပတ်သက်၍ နေပြည်တော်တွင် ပြင်သစ်အခြေစိုက် Novotel ဟိုတယ်နှင့် ဂျာမနီအခြေစိုက် Kempinski Hotel ဟိုတယ်တို့မှာ မကြာမီဖွင့်လှစ်တော့မည်ဖြစ်သည်။ ထို့အပြင် ငပလီ၊ အင်းလေး၊ ပုဂံ၊ မန္တလေးနှင့် ရန်ကုန်မြို့များတွင် Hilton အပါအ၀င် နိုင်ငံခြားရင်းနှီးမြှုပ်နှံမှု ဟိုတယ်များဖွင့်လှစ်ရန် စီစဉ်ထားကြသည်။

အလားတူ အချိုရည်လုပ်ငန်းတွင်လည်း နိုင်ငံတကာရင်းနှီးမြှုပ်နှံမှုများ ၀င်ရောက်ရန် ပြင်ဆင်နေကြသည်။ ဘဏ်လုပ်ငန်းတွင်လည်း နိုင်ငံခြားရင်းနှီးမြှုပ်နှံမှုဘဏ်ကိုးခုကို မြန်မာနိုင်ငံတွင် ဖွင့်လှစ်ရန် အစိုးရက ခွင့်ပြုထားခဲ့ပြီးနောက် ခြောက်လ၊ တစ်နှစ်အတွင်း ဖွင့်လှစ်ကြတော့မည်ဖြစ်သည်။ ထို့အပြင် အစိုးရအနေဖြင့်လည်း နိုင်ငံတကာရင်းနှီးမြှုပ်နှံမှုများကို ဖိတ်ခေါ်လျက်ရှိသည်။

ထို့ကြောင့်လည်း ၀န်ထမ်းရေးရာနှင့်ပတ်သက်သော ၀န်ဆောင်မှုများကို ပြင်ဆင်ရတော့မည့်အချိန်ဖြစ်သည်။

‘‘အဓိကက ၀န်ထမ်းရေးရာကို မပိုင်နိုင်ကြသေးဘူး။ HR ပိုင်းတွေမှာ နိုင်ငံခြားသားတွေလောက် စနစ်လည်းမကျသေးတဲ့အပြင် အမြင်လည်းမကျယ်ကြသေးဘူး’’ဟု ကုန်သည်ကြီးများဟိုတယ်တွင် တာဝန်ထမ်းဆောင်ခဲ့သူ မလွင်မာအောင်ကသုံးသပ်သည်။

လုပ်ငန်းရှင်များအနေဖြင့်လည်း ၀န်ထမ်းရေးရာနှင့်ပတ်သက်၍ တိကျသည့် မူဝါဒမချထားသဖြင့် စီမံခန့်ခွဲသူများက မိမိထင်သလို လုပ်ဆောင်နေမှုများရှိသည်။

မြန်မာလုပ်ငန်းရှင်များအနေဖြင့် မိမိကြိုက်နှစ်သက်သော ၀န်ထမ်းအား ကောင်းမွန်သည့် ၀န်ဆောင်မှုပေးသော်လည်း ၀န်ထမ်းရေးရာနှင့်ပတ်သက်၍ မူဝါဒတစ်ခု သတ်မှတ်ပေးခြင်းမျိုးနည်းသည်ဟု ချက်ထရီယမ်ဟိုတယ်တွင် HR မန်နေဂျာ တာဝန်ထမ်းဆောင်ခဲ့သူ ဦးဂျောကျော်ဇောက သုံးသပ်သည်။

ပြည်တွင်းလုပ်ငန်းရှင်များအနေဖြင့် ၀န်ထမ်းရေးရာနှင့်ပတ်သက်၍ ပြင်ဆင်ရန် ယခုအချိန်သည် အကောင်းဆုံးအချိန်ဖြစ်သည်။